venres, 13 de novembro de 2015

REFRÁNS DE NOVEMBRO


O undécimo mes do ano ten en galego diversos nomes á parte de novembro: Santos, Mes de Santos, San Martiño.... E coma veredes algúns destes aparecen no refraneiro.
Entre os refráns de novembro atopamos referencias á raíña das froitas do outono e protagonista principal dos magostos: a castaña.
  • Castañas, noces e viño fan a ledicia de san Martiño.
  • Polo San Martiño vai ver o teu soutiño. 
  •  Por san Martiño faise o magosto con castañas asadas e mosto.
 O refraneiro deste mes é pródigo en alusións á matanza do porco:
  • A todo porco lle chega o seu san Martiño.
  •  Non hai cocho bon nin ruín que non lle chegue o seu sanmartín.
E por suposto, en lembranzas das tarefas agrícolas que cómpre realizar:
  •  O que queira ter bo alliño, que o semente polo san Martiño.
  •  Por san Martiño e san Xudas, piñeiriña das túas uvas.
  •  Sembra trigo en San Martiño, cada día un pouquiniño.
  • Sementeira na semana de San Román nin palla nin gran; sementeira na de Santa Baia, gran e mais palla.

Mesmo, coma é habitual,  aparecen referencias meteorolóxicas:
  • Cando Santos acaba, o inverno empeza.
  •  De Santos ó Nadal é o inverno natural.
Moitas delas sobre o "Verán de San Martiño":
  • O vrán de san Martiño pode ser grande ou pequeniño.
  • O vran de San Martiño son tres días e un pouquiño.
  •  O vrau de san Martiño dura mentres o can lambe o fuciño.
Se queredes coñecer máis refráns do "Ditoso mes que empeza con Santos e remata con San Andrés" premede neste enlace.
Imaxe atopada aquí.

Ningún comentario:

Publicar un comentario